Uansett stor eller liten reiskap: Det er viktig med rett leigepris. Foto: Iselin Merkesdal
Leige av trøtraktor?
Det kom inn eit spørsmål – eit av veldig få du til no ikkje finn svar på i Bedre Gardsdrifts maskinleigeprisliste: Kva er dagsleiga på ein trøtraktor?
Enten du driv stort eller smått, maskinleigeprislista vår skal vere til nytte for alle. Difor gjer vi også ymse justeringar kvart einaste år, for å kome alle brukargrupper i møte.
Eit spørsmål vi ikkje har noko svar på enno, er prisen for dagsleige av trøtraktor. Det er i høgste grad aktuelt for open gard og liknande arrangement. Eller for den del barnebursdagar eller slektstreff med behov for utvida maskinpark.
Vi i Bedre Gardsdrift tar alle seriøst, både små og store. Så har du forslag til ein pris, gi oss beskjed! Bør det vere tillegg for gummihjul og frontlastar, eller blir det u-rett-ferdiiig? Skal der vere tillegg for leige av reiskap?
Denne prisen er det ikkje naturleg å rekne moms på, men derimot er et eit spørsmål om leiga skal fakturerast, gjerast opp kontant, eller for den del utbetalast i is.
Alt slikt kan du svare på under.
Fristen for å melde inn prisar på anna maskinleige er ute for i år, i og med at vi treng ein del tid på den vidare behandlinga av det store talmaterialet vi har fått inn. Men trøtraktor-prisen skal vi klare å smette innimellom dersom vi får svar innan 2. mars.
Maskinleigeprislista i Bedre Gardsdrift omfattar prisar på leigekøyring og maskinleige for kring 500 reiskapar og arbeidsoperasjonar.
Prislista blir oppdatert kvart år, og er unik i sitt slag.
Lista inneheld maskiner og reiskapar i nesten alle storleikar, frå batteridrill til sjølvgåande haustemaskiner.
No ynskjer vi også å legge inn traktorar som går med 100 prosent biologisk motorisering, og med trinnlaus hastigheitsregulering både framover og bakover.
