John Deere, Fendt, JCB og Valtra i BGs julebastard

Nok ein gong viser nøtteknekkarar i alle aldrar solid innsats. Bastarden på julaftan er i mange heimar blitt ein minst like viktig juletradisjon som ymse filmar på NRK, og det varmar eit gammalt nissehjarte.

Om ikkje mange dagane vil nissane trekke vinnaren av bastard-nøtta, og også vinnarane av hovudpremiane i årets BG-nøtter. Og dessutan legge ut julehelsingane som dei mange nøtteknekkarane kom med mens dei svarte på den siste nøtta.

Blar du i bildekarusellen over, finn du både oppgåvetraktoren, skissa nissane arbeidde på, der du kan sjå sveisesaumane, og dei fire bileta bastard-nissen starta med.

Det mest typiske feilen var at mange trudde blåfargen var frå New Holland. Men som nissebarna peika på, då bastarden vart drøfta i baksetet på sleden veg heim frå julegudstenesta, metallic-fagen til New Holland er mørkare. Faktisk gjorde nissen ingenting med Valtra-hytta, ut over å fjerne logoen på seteryggen. Også dei fleste andre alternativa på lista har fått sine kryss.

Til så lenge ynskjer BG-nissane og alle som arbeider med Bedre Gardsdrift ei framleis fin og fredfylt jul til alle lesarane. Bruk gjerne ventetida til å sjå gjennom artikkelen med svar, vinnarar og kommentarar så langt. Eller gjer deg kjent med dei nye nettsidene våre, og legg gjerne att julehelsingar med eller utan bilete i debattforumet vårt!